假戰

好一場大龍鳳，
三位侯選人做戲咁做，
人人也開開心心睇戲咁睇。

此際港大推出一人一票選特首模擬，
表達己見？預演？收集民意？
嘥氣，再多白票都會當透明，
只是戲看得爽、花生吃得暢，
熱鬧就大家都湊得開心。

PopVote 活動，
網上投票又得、裝App 投票又得，
親身到投票站投票亦得－－
是次模擬投票提供十六個票站，
包括港大、理大、城大、屯門大會堂等。

友說：「港大！？政治意識差！唔玩！」
可卻不見社會更具規模的模擬選舉，我玩。
一直民調太多、隨後的問卷也太長，
今次梁就梁、何就何、唐就唐、白就白、剔一剔，乾脆。

我不介意、甚至湧躍假戲肉緊做。
好！要投票，就要認識一下參選人才算禮貌。

一號梁振英，
想做聖人－－想你以為他真是聖人，
從來無錯、理所當然就永無認錯。
永遠遊花園、句句話留後著，
旨望他為港人發聲？睬你都傻。
見他額角滴汗，叫人抹一把冷汗。

二號何俊仁，
自從兩場辯論，民望升高。
大驚小怪也，律師出身，口才好是基本功。
參加小圈子選舉去反對小圈子選舉？你信我唔信。
中央連其名字都不記得、亦不得民心，
於是「揭示小圈子選舉醜陋」成為包底口號。
玩這舖，只為重組泛民、為民主黨擦擦招牌。

三號唐英年，
說政綱，跟梁振英其實很接近；
說方向，明知李嘉誠撐硬，就等如地產仍然霸權。
不如說說這個「人」，倒更有趣。
他的自殺式爆大鑊，叫我另眼相看。
他識嬲了、長大了，讓我以為自己睇住佢大。
後來他上商台接受訪問，
主持問：「為什麼選擇這刻爆大鑊？什麼居心？」
唐英年諗都唔諗：「佢辣㷫我囉！」
先別說無能不無能，至少他像人。
一舉一動，開始令我覺得佢好cute。

但願有四號，唐太郭妤淺，
她參選，我肯定想搏一舗。（兼如果我有投票權）
幾次面對公眾，她比三位特首侯選人更具大將之風，
外柔內剛，動之以情、說之以理，
每次訪問，反應又快又淡定。
她的行動，讓丈夫感激她、珍惜她；
亦讓公眾捨不得繼續責怪她，頂多搖搖頭嘆曰「愛得傻」。
你以為她蠢？別人笑她傻癡癡，她笑別人太奄尖。
她肯定是個醒到暈的女人。

明天下課，到藍區投白票去！