正在半空中的你

今天以後，
幾多個麻麻生忌死忌不能相見了；
幾多個新年不能相見了；
拜山也不能一起燒鼻涕了。

每次家庭聚會，
要是我會參與，媽都特別想你也來；
而若你會出席，媽又會叮嚀：
「雯雯你也來吧，冇你傑傑好鬼靜。」

總覺得自己在家庭裡格格不入，
明明即使在最反叛最愛扮型的年紀，
我也不至於惡到掛條鐵鏈響身。
有時我懷疑長輩是嫌我一孖人字拖就走天涯成何體統
（又唔去做下美甲先喎），
又有時懷疑這是在眾同輩中長得特別矮的原固
（都跌在視點以下嚕）。

肉麻但確實地，只有你一直體貼又窩心－－
不管我讀書係七科肥定係七個A、
不管我長髮短髮曲髮直髮黑髮紅髮金髮定白髮、
不管我閉門千日諸事不理抑或拉banner 衝出街挺腰掟蕉、
也不管我做洗頭妹做sale 屎做recep. 做shipping 做秘書做跟單
做保安做marketing 做蝦條姐姐定係跑返轉頭做學生妹。

你有你繼續鐵人賽繼續沉迷天文地理，
我有我日煲夜煲《花師奶》兼畫畫埋埋一大堆鬼五馬六四不像，
走在一起時，我們還是可以由跳《開心舞》到耍《西瓜拳》、
由研究鴨的味蕾到追查企鵝的腸胃、
由第一口飯到 *第七道菜、
由最弱能的笑話到最深切的悲傷。
*（隱喻在裡面請給我讚。）

總在分別時才特別感激互聯網，
慶幸想念時我們仍可以chok chok chok 爆彼此的芒。

又或者祝願我突然發達，
即刻拖埋我阿爸我阿媽你阿爸你阿媽你班家姐你姨媽你堆表姐仲有個表哥添，
再搭多隻cute 到裂開的 *兔寶寶bear bear 熊，
飛過嚟搵你。
*（請自行幻想屬兔寶寶科的bear bear 熊。）



附上廖穎怡金句可保平安。
並請想念我這些像香腸的手指。