札記

我喺我屋企樓下寄信去我屋企樓下。




*

腳：我作咗聖誕歌！你快啲唱
哈：我要唱我要唱！
腳：好易，A、F#、B、E
哈：幾時幾時？？？
腳：25 號！
哈：早啲喎我下晝要去睇借東西的梁韻雯
腳：？？？
哈：《借東西的小矮人》呀…
腳：XDDD 好想睇！
哈：去電影中心先有日文版，如果唔係要聽G.E.M. 唱主題曲
腳：借n_n 開
哈：我識唱華仔首新歌兩句你聽唔聽？
腳：唔聽
哈：♪ I DON'T WANNA SAY! GOODBYE! 今天我置身這四面台 ♪
腳：我BB 仔睇佢又係咁樣，變咗麻甩佬佢都係咁樣，你話驚唔驚
哈：佢一定係日日飲防腐劑當水飲
腳：可能係機械人，華2.0
哈：去元朗搵下有冇煙紙買先！要唔要手信？元朗特產呀咁
腳：要！援交妹一盒
哈：我搵搵先，搵到就買啦
腳：要熱嘅
哈：叮返熱一樣啫


*

哈：我要摘個聖誕波俾你。
Ｋ：去邊摘？
哈：行過啲咩商場，摘得到嘅就摘。
Ｋ：好…
哈：我一定要摘個聖誕波俾你。
Ｋ：得得得……

（正路過德福商場一聖誕樹。）

哈：（拉扯其中一個波）頂！纏實咗摘唔到落嚟…！
Ｋ：（哭）算罷啦…我唔係咁想要架咋…
哈：（歇斯底里繼續扯）你想要嘅…！
Ｋ：（哭）我真係唔想要喇…
哈：（看進對方的雙眼）嗯，女仔就係怕羞啲。

－－全世界靜止三秒後，Kimi 拋下我拔足狂奔遠去。


嗯，都話女仔就係怕羞啲。


*

以前經常因為雜誌的贈品而買雜誌。

見佢送對靚靚人字拖先$15 本，買；
見佢送名牌眼影先$30 本，買；
見佢送埋化妝袋先$20 本，買！

買買買買買！
而雜誌本身總被原封不動掉去回收。

本地雜誌與日本的不同－－
日本雜誌都好鬼興送禮，
然而所謂的「送」實質為「賣」，本本都貴到飛起。

最近又見幾本送禮誌搞到我心郁郁，禮品如下：
縮骨遮、水壺、iphone4 case、蔘蜜。
（蔘蜜！？真係行行下街見口喝，買佢抵過入7 仔。）

突然醒覺，
件禮物我有冇用先！？
咁本雜誌我會唔會睇先！？

不過，近日非常期盼有本平價雜誌可以再送人字拖。
唔係人字拖，唔洗旨意我再心動。