阿哈：
好，今日所有banner 呀、紙扎公仔呀、假棺材呀……通通都要出動，全部過海，中環集合……唔知喺邊度解散……自備糧水，鐘意飲可樂嘅飲可樂，鐘意喺嗰度沖咖啡嘅就沖咖啡，但唔該自備咖啡粉……如果串到帶咖啡豆都得，將咖啡豆放喺電車軌度輾爆佢變做咖啡粉亦得，真係要講句「亦得、得咗」（唔知點解我好鐘意講「亦得、得咗」呢四個字，真係好似鬼上身咁……）。至於熱水方面呢，大會係唔會提供熱水……黠解冇熱水？？？（下刪24 個問號）問功能組別啦。但唔緊要，我哋已經諗好咗喇，預計今日氣溫高達31℃，放杯凍水喺太陽下七粒鐘度啦，應該會變熱水架喇……到時沖咩都得啦。至於食嗰方面呢！！！大家千祈唔好帶飯呀下！係冇雪櫃嘅……記住係冇雪櫃呀下！咁食咩呀……？大家一係自備啲咩嘉頓忌廉檳呀……美心魔鬼蛋糕呀……呢啲都冇咩問題，不過我覺得帶辣辣壽司去都唔錯，因為可以玩「辣辣壽司邊個食，曾任權唔食，何俊仁食」呢隻game，唔該輸咗嗰邊要去推公安所設嘅鐵欄兩嘢……兩嘢好喇，兩嘢之後返嚟繼續玩。至於康樂方面呢！！！大家可以挫下啤呀、排下九呀、大下細呀…，都冇咩問題……總之各式其式，任君選擇。
阿 *「太Ｘ酒店」譚先生（* 註：一打嚟就「搵你senior 同我講嘢」兼「我要投訴囉」嘅client），我已經約咗佢喇，九點準時喺立法會正門等……但其實我哋喺皇后像廣場嗰邊嘅，到時個傻仔就呆等喇……hahaha……點先見到我哋？唯一辨法就係打低功能組別……打低咗之後譚生就會見到我哋架喇。如果譚生不滿咁點呀？唔緊要，投訴囉，問公安拎曾任權senior 電話囉……啲公安即刻的佢上豬籠車囉……
拿，你今日身負重任架……你今日將會拍伙陳巧文嘅……大家今日都要赤腳嘅，跟住大家拎住塊網球拍打網球，用鐵馬嚟做網……啲公安走過嚟趕嘅話咪同佢講：「阿蛇，而家打網球唔俾呀」、「未見過赤腳打網球呀……睇雜誌啦……唔該……outday」。打完網球之後呢！你就同陳巧文圍立會苦行，組成一隊「美少女苦行組」，到時功能組別行埋一邊啦……
嘩！！！阿Sam 同Simon 返嚟喇！我要讓坐喇，如果唔係佢哋一個的手、一個的腳……真係的我上豬籠車咁呀……最後嗌下口號先！！！
打低功能組別！！！
打低 *阿趙！！！（*註：堅決表示「六四鎮壓」冇錯嘅同事）
用紙扎坦克車鏟爆阿趙！！！
……
……
……
……
……
……
……
……
（一路嗌到返屋企。）
阿Kel
*
Kel－－公司唯一會跟我講這些話題的同事。
收到這張紙仔的時候，
我邊睇邊「焗蟹」笑到標眼水，
最後足足重複看了六次。
太鐘意，所以放上來。
雖然因上班而都沒真的去圍立會，
然而在這時刻總算有個人一齊講下、
諗下點樣出通告要全公司去圍立會，都好。
（陶君行那句「請假都要圍立會」叫我差點真的就去請假了…）
No comments:
Post a Comment