今日嘅義工隊有大約三十人，過半係中學生。A隊係我哋素人隊跟住明哥走行人路；B隊係幾個資深義工，推車仔帶住飯盒、餅乾、水果同飲品。沿住北河街，去到「越南區」（越南難民聚居嘅地方），一轉入天橋底，就到咗露宿者區域。
喺天橋底，無數間「屋」- 其實係執執埋埋、大大細細嘅板搭出嚟嘅空間 - 好多間，前後都望唔到盡頭咁。個個門口都堆住一啲爛到執左返嚟都用唔到嘅傢俬，花叢啲植物都枯死哂咁滯、幾分鐘就有大老鼠跑過，而行人路因爲啲磚甩左而凹咗好多窿。領隊話偶爾會有針筒（有人吸毒），要小心唔好吉親。佢哋好怕人咁，會匿埋，明哥逐家敲門問要幾多個飯盒。得少數係喺出面排隊等拎。
後來明哥講返，佢哋有啲係難民得行街紙所以無得去搵工，有啲係傷殘老人所以食白粉就唔知痛（就算突然醫返好佢哋都又老又殘搵唔到嘢做）。就算俾佢哋排到公屋，唔好話按金，連搭車去房屋署嘅錢都無。
由於唔想因爲自己賣平飯、搞到其他舖頭無生意做，所以每次派飯都搭送餅乾、飲品、生果，都係幫襯附近舖頭，而且買時唔准講價，人哋話10蚊五個就10蚊五個。過多捐贈物資就送比小舖，等人哋平賣、街坊又可以平買；又或者轉贈更大嘅機構，例如地球之友。
成隊人跟住明哥行嗰陣，沿路都有街坊同佢打招呼，而啲露宿者都全部已經識得佢。一把年紀，身體力行，佢一句「我要人人有兩餐飽飯」，頂天立地。
今日，我哋派咗150 個飯盒。
北河同行
