為咩？如果我話，我想保住個band scene、想保住用工廈搞藝術嘅權利，係咪大諗頭？緊係啦！我以為自己邊個？做出嚟嘅嘢又可以有咩影響力？咩叫以卵擊石，我好感受到。
你永遠係最清楚你自己嘅人，尤其呢啲時候。睇住自己見底喇、無料喇，好真實，無得扮勁。咁點？都要試㗎！一定可以再豐富啲、一定可以扣得再緊啲、一定可以再完整啲。
批評自己、審判自己、挑剔自己。
中途一直想嗌救命，想搵幫拖。唔係搵人實際上幫乜，只係想同一啲聰明人傾兩句，指點下迷津。嗯，但係未得，起碼要有個完整第一稿先。呢個係責任問題。亦係關乎誠意嘅態度問題。
坐喺電腦前面扣呀扣，咁就寫咗幾十個鐘。重複讀咗幾十次，知道自己暫時做唔到更多。
望下個鐘，凌晨五點半。
為篇嘢打埋個cover：「《文化及創意產業：探討音樂界別之扶助與發展》，2016年7月15日。」
熄電腦，去瞓覺。
瞓醒，收到消息：紅線音樂嘅Gary Chan 喺朝早五點半走咗。
雖然佢的而且確出現過喺我心入面嘅「嗌救命名單」，雖然兩件事並無直接關聯。只不過、只不過，當我再打開份document、望住個cover，喺正中間嘅日期於是顯得煞有介事。
紅線音樂嘅理念，就係indie 同主流嘅連結、每個人嘅連結。睇下觸執毛、Supper Moment、雞蛋蒸肉餅，你知道，佢一定做得到。
同Gary 唔熟，但幾次嘅交流都印象深刻。
最開頭，同佢無意間開始咗食字遊戲，兜口兜面時玩咗一輪、笑咗一輪，以為完喇咩？點知第朝一瞓醒，收到message，原來佢突然靈感到，仲玩緊。於是個game，以每十個鐘輪流一轉嘅龜速而又玩多幾日。當時我拎住部電話心諗：吖，呢個人真係好鐘意《齊來動腦筋》。
到後來，同伙伴有嘢想搞，有啲嘢諗唔通、無信心，基於聽聞過佢嘅才智，膽粗粗走去請教佢。佢將諗到嘅、可行嘅都講出嚟。我慨嘆：「真係聽君一席話，勝讀十年書。」佢笑咪咪，不置可否。今日睇返，成件事同佢預期嘅一樣。
再之後阿庭同Amada 結婚嗰晚，喺Fringe Club 有幸睇到久仰大名嘅SIQ 表演，嘩，你哋洗唔洗咁勁？嗰一晚，我見識到Gary 喺organize 以外、打鼓嘅魅力。
佢真係好聰明、好有才華，處事冷靜，而又充滿幽默感。
Gary 走咗，同佢熟嘅，肝腸寸斷；同佢唔熟嘅，難過婉惜。畢竟喺indie 圈子入面，有心有力有才嘅，真係無幾個。唔講啲乜，立志要令到香港樂隊可以忠於創作咁以音樂維生嘅，仲有邊個？佢講得出、兼做俾你哋睇。
見到佢嗰三隊樂隊喺facebook 話要延續Gary 嘅精神，令我再次思考生命長短同生命意義嘅關係。我又有無好好尊重自己仲呼吸緊嘅時光、對唔對得住自己？
Gary，re:spect。
